13 Romane partije, adava nane demokratija adava i predavstvo.

Dzi kote o Romane chave ucinena ko phage ucilnice em frdime taro edukativno sitemi, dzi kote cela familije zivinena bizo osnovna uslovija bashi zivot, dzi kote o institucije bershencar ignoririnena e Romen sar nevidliva gragjanija- amen khelaja amenge demokratija 13 Romane politicka partije.

Oja, 13 (Deshutrin).

Zar cache mislinaja deka adava tano jek barvalipe e Romenge? Zar chache verujnaja deka adava sikavela politckko zrelost? Na. Adava i ladz, apatija, politicko necesnost em potkupenost ko naj ucho nivo. Adava tano luksuz so nashti te dozvlonina le amenge – ama na bashi o resursija, nego bashi sovest.

Akava nane politcko sila, akava i politcko slabost!

13 partije, a ni jek realno politicko pobeda.

13 partije, a ni jek Romano prateniko.

13 partije, a palem o Romano puchibe tano uvek posledno ili ne postojecko ko dnevno redo.

Akava nane slucajnost, akava tano rezultati taro svesno razdelibe,, sitna interesija, hovavne liderija kola kerena trgovija e glasoncar taro piro sopstveno Narodo bashi than ki izborno lista ili sovetnicko plata. A o narodo ? Odma tano bisterdo palo izborija.

Pobuter taro akala partije tane samo dekorativna produzetkija e bare Makedonsko partijenge, kerde samo bashi jek cel – te rasturinen o Romano politicko telo em te keren le bezopasno em ne mokno te shaj niked te na oven cachutni sila.

Em sa adala so khelena akava scenario, svesno, kjutibaja, teljarde shereja – nane prestavnikija e Romengere. Ola tane predavnikija.

Ma ocekujnen pocit tari drzava, ako prvo tumen sar partije khelena tumenge e Romane dostoistvoja. Ako kerena lafi bashi pravija, a na reagirinena koga kerela pes etnicko profiliriba, keda o Roma tane iskljucime taro sistemi ili pa ako rodena ramnopravnost, a glasinena em prifatinena budzeti pozicije bizo pare em direktno impakt e Romane zaednicake.

Keda ka ovel tumenge Dosta ?

Na trebona amen 13 partije, amenge trebola:

–Jek politcko platforma vizijaja em cvrstvo staveja

–Liderija save nane ki prodazba em save na darana te keren lafi

-Jasno, hrabro, direktno politicko govor savo na molinela, nego rodela

-Generacija taro terne Roma so nasti uceninena len, so nane tivka em nane prifatime samo adaleske so na kerena politicko problemi e gadzenge.

Soske ako produzinaja agahar -sigende ka nashavgova taro politcko pejsazi, ka achova samo brojke ko popisija, statistike ko izveshtaja, glasija ko izborija em narodo bizo glaso.

Ako na khedena pe, ola ka keren te khuva ko bisterde!

Akate nane amen vishe izbor: ili konecno ka kheda amen, bizo suete, bizo fantomska partije, bizo hovavne prestavnikija – ili pa ka produzina te ova tvka, razdelime em bezopasna.

Politicko obedinibe nane « Luksuz », adava tano edinstveno izlez e Romane zaednicake. Bizo obedinibe khedibe ko jek than, sekova obid bashi promena ka achol pale samo cuchi recenica ki panda jek beznacajno izjava bashi mediumija ili pa status ko socijalna mreze.

Nikoj nikaske na duzinela nishto, ama amen sar zaednica duzinaja adalenge so ka aven palo amende, ma te ova soucesnikija akalenge so dzi akana vodinena i Romanni politika, te mukha pala amende zaednica savi dzanela so mangela em savi ka dzanel sar te borinel pes bashi adava.

13 partije? Adava nane pluralizam.

Adava tano razdelenost, korupcija em politicko karikatura.

Ili ka achava akaja farsa korkori amen – ili ka dozvolina te achaven amen za stalno.