2to Avgust: Samo te setina amen bizi strategija nane dovolno

Avdije, but dzene spodelinena slike, zalna statusija thaj citatija. Adava i shukar, o 2to Avgust mora te odbelezinel pes, Adava tano o dive kogra o Roma ko celo sumnal setinena pes ko SAMUDARIPEN o genocid savo sine kerdo upra ko Romano narodo. O dive keda upreder 500.000 Romane zivotija nashavdile tela ko nacisticko rezimi, a i istorija decenijencar ikerga akale zrtven ki senka thaj nedostojno bisterde.

Ama dzi kote setinaja amen ko akala zrtve, nashti beshaja em kjutinaja: kaj tano amaro vlijanie avdije? Soske em palo 80 bersh, o romano glaso panda tano tivko ko institucije, a amaro Romano prisutsvo ki politika tano simbolicno (ma te phenav figurativno) ili partisko instrumentalizirimo?

O problemi nane samo ko sistemi. O problemi tano em ko amaro na jekhipe. Rasparcime sekoj ki pli strana, licna interesija anglo kolektivno vizija, podelime ki vera, ki religija, ko partije. Ko dive keda odbelezinaja o naj kalo cini protiv amaro naoro, mora te pucha amen: So keraja avdije za da te na slucinel pes tajsa?

Bizo zorali, obedinimi Romano politicko platforma nane realno pritisok upra ko drzave. Bizo koordinirimo aktivizam, bizi strategija, bizi vizija koja dzala po dur taro bersheskoro proekti em donacije, amaro vlijanie achola simbolicno a amari istorija « marginalizirimi ».

Akava setibe ko amare mudarde Roma mora te ingarel amen ki akcija. Samudaripen nane samo taga, adava i dokaz deka koga jek narodo tano bezglasno em bi shtitimo, lesno ovela meta nekaske. Avdije na phiravaja znacka ili zvezda, ama phiravaja nevrabotenost, segregacija, govor tari omraza em politicko marginalizacija.

Avdije, dzi kote chivaja slike, statusija, citatija tharaja momojla, ajde te thara em amari svest bashi jekphipe, bashi platforma, zaednicko dejstvo em pritisok. Samudaripen na smijnel te achol samo memorija, nego mora te pretvorina le ko motori bashi cachutni organizirimi em dugorocno borba.

Te setina amen, ama em te organizirina amen.

Te zalina, ama em te kheda amen ko jek than.

Soske i chachutni pochit dzi ko mule avela keda ka obezbedina dostoinstveno zivoto e dzivdenge.