Kolumna: „Kujbe palo dumo so dukhala pobuter tari šamarka » Altaj Durmis

Amen, o Roma odamna siklilem te parava men uluzijencar. Iluzija baši „poddrška », iluzija „mangipe » taro tugja vasta kola kuvena palo dumo – ama adava kujbe tano sar eho ki čuči kutija.

Sekad i gudlo avrijaldan, a andre – ništo čučo.

Dzi koga ka živina taro tugjo aplavuzija, ked amaro rat odamna adzikerela te ovel šundo glasno? 

Odobor li milno amenge adava tugjo kujbe palo dumo, kova tano samo jek podvrda deka sijam samo brojka – broj bašo glasibe, broj ko socialna statistike, broj ko grobija ko Butel? Ka gušinen amen anglo izbojra, em ka parunen amen kjutibaja palo izbojra. O ovavno mangipe tano i najevtino droga (lepako), a amen ka primina la doza po doza sar zavisnikija bare kola na mangena te lečinen pe.

I ironija dukavdi: amen korkori amenge kheraja slopke, sar te vakere adava amenge naj baro zadovolstvo. Mangaja te dikha manuše sar perela, za te čuvstvina amen deka postojnaja. 

A vsušnost, sarine zaedno pašjlovaja ki čik – samo so jek jekeskoro šero hor gurinaja ki čik.

Pamtinen: Isi amen jek Rat so trebela te spojnel amen, a na te delinel amen ki vera, kultura, em politika. Ako našti te manga amen – bare te počitujna men. Soske bizo počit, ka ačova samo broj – broja so nikoj na čitinena len, osven ko spisako meribaskoro.

Ajde jek puti, namesto tugjo vas te kuvel amen palo dumo, te da amaro vas – ama na te perel nekoj, nego te uštel. Inače, ka ačova večno statistika ko tugja lila, bizo glaso em bizo odnina.

Durmiš Altaj – Mesnevi.