O problemi na avela amenge avraldan, nego korkori amendar !

Me sar Rom, odobor vreme probinava te haljovav soj tane o pricine so amari zaednica achola ko than, soske o talentirime manusha nashavgovena tari javnost, soske o terne gubinena motivacija, a i nada sa povise achola samo chucho lafi. O chachipe dukala ama mora te vakerel pes: o problemi na avela amenge avraldan, nego korkori amendar.

Man sar Roma, but cesto dzanaja te ova amare naj bare neprijatelija. Namesto te pridruzina amen, te da amen vas vasteja, amen cesto dikhaja amen sar neprijatelija. Ako nekoj tari amari zaednica uspejnela, namesto te dicina amen oleja te ova gorda, amen uvek isi amen sumnja. Odma pocminaja te pucha amen: « Koj pomozinga le? » , « Savo proekti lelja? » , « Koj beshela palo leste? » , namesto te podrzina le em te phena leske: « Bravo phrala uspejngan! »

A na samo adava, sekoj amendar racuninaja amen strucnakija ko sa – ki politika, obrazovanie, aktivizam, religija, pa cak sto vise em javerengere zivotonge. Sekas isi le mislenje, ama but hari mangena te shunen em te sikljoven taro manusha save chache tane ekspertija ko plo domeni. Sekoj dzanela sar « trebola te kerel pes », ama retko koj lela nesavi odgovornost konkretno te kerel neshto.

O problemi isto aghar tano so but puti adzikeraja nekoj javer te reshinel nesavo problemi, em keda ka pocminel adava o javer, amen odma ovaja leske kriticko masa, na adaleske so na kerela shukar, nego avela amenge pharo soske ov a na me, pa vakeraja « adaja sine mi ideja » – « muk le be sa ov dzanela » – « abe ov kerela akava soske finansirinena le ».

Problemija isi amen, sar soj i diskriminacija, na vakerava deka na postojnela, postojnela em realno tani, ama nashti celo vina uvek te frda la avri amendar. Ako amen mashkar amende na pocitujnaja amen, soske ocekujnaja o javera te pocitujunen amen?

Nashti borinaja amen bashi poshukar Status sa dzi kote pala ko dumo randaja amenge jame. Nashti keraja lafi bashi jekhipe, a palo adava te ogovorina em te sabotirina amen jek jekheja. Nashti te gradina avutnipe (idnina) sa dzi kote vlecinaja amen ko sopstveno mentaliteti.

Na pishinava akaja kolumna taro holi, nego taro mangipe. Mangipe prema miro narodo thaj o manusha save zasluzinena te oven podrzime. Me mangava te dikhav amen gorda barikane, obrazovime, splotime, vlijatelna ko politicka odluke ko phuvja savende dzivdinaja. Ama sa akava nane te avel ni tari EU, ni tari Vlada, ni taro jabandzije – adava mora te pocminel AMENDAR!

Koga ka sikljova mashkar amende te cestitina amenge o uspeh em te podrzina o pridones, te pomozina amen, te radujna amen javerenge ko uspeh, togas ka ovel chachutno angle dzajbe. A dzi tegani, ka ova amenge sopstveno problemi.