Taro popularnost dzi ko odgovornost: iskreno buti keribe ili samo vidlivost ?

Ko palune bersha, sa povishe em povishe dikhaja terne em povozrasna manusha save mangena te oven « liderija » e Romane zaednicake, javna licnostija, aktivistija, prestavnikija em red panda javera « titule ». Adaja volja nane nisavo problemi, naprotiv potrebna tane neve glasija, nevi energija nevi vizija e Romanipaske. Ama o puchibe tano: dali sa adala manusha cache tane vodime tari zelba te pridonesinen neshto e zaednicake, ili samo zelba te oven dikhle (vidliva)?

Popularnost nane nisavo problemi koga tano ki sluzba bashi zaednicka vrednostija. Ama koga tani i cel te ove samo « penzardo » bizo realnoo pridones, tegani avaja ko seriozno predizvik: glasna, ama chuche narativija; prisustvo bizi sushtina; slike bizo rezultati.

I zaednica isi la chachutne potrebe, sigurno sarine dzanaja len soske but cesto povtorinaja o potrebe kola i iminentna em rodena cachutno angazmani: obrazovanie, zdrastvo, vrabotuvanje, zastita tari diskriminacija. Akala problemija na reshinena pes statusencar so ko socijalna mreze, selfie slikencar ili pa cuche populisticko motivacisko govorija. Nego reshinena pes bukjaja ko teren, sorabotka, posvetenost. Te ovel pes lideri ili glaso e zaednicake znacinela te lel pes odgovornost, na samo ko uspex nego em bashi i kritika, propustija em o licno hranibe taro ego.

Jek taro interesna bukja so dikhava ko posledno bersha, tano uvek keda nekoj neshto pocminela te kerel te gradinel, ikljon manusha save bizo te adzikeren te dikhen em te haljoven soske kerela pes em soske i vazno Romani institucija savi kerela vlijannie ko ucho nivo, taro naj tikno nivo ikljona manusha em preku adaja lengiri « vidlivost » chivena kocnice adale manushenge. Nane amen panda i kultura te haljova, deka nashti ovaja ekspertija ko sa, deka ponekad mora te prifatina o chachipe deka isi amendar manusha so tane po iskusna ili po stratesko orientirime e Romane kauzake, amen o obratno 100 like 80 komentarija em amen sijem adala so sa dzanaja, a ustvari dzanaja savo tano o intelektualno kapaciteti mashkar amende.

Akaja kolumna nane napad nikaske, akaja kolumna tano povik sar te podobrina adava so dzanaja te kera:

Ako isi platforma (vidlivost) iskoristin la te zojrakere o glaso adalengoro so nane len.

Ako prestavineja tut sar aktivisti, puch tut save konkretna rezultatija mukhljan taro tiro aktivizam.

Ako rodeja vidlivost, proverin dali phiraveja vrednostija.

Em ako nekad greshineja, priznajn, siklov, produzin ponadarig po bare zrelosteja.

I Romani zaednica isi la but potencijali, ama trebola ola manusha so na borinena pes peske, nego sarinenge. Manusha so dzanena deka o chachutno uspeh na merinela pes followerencar ili likoncar, nego merinela pes o broj taro promene so kergan.

Vreme tano te smenina o status ko facebook taro « Dik me » em te khuva ki faza taro status « So shaj kerava » Adava tano chachutno liderstvo.