Ќе преживееме со вас или без вас, ние сме тука за народот!

Тие што имаат моќ на пари, не сакаат ромските медиуми да имаат финансиски средства за работење.

Андријано Џеладин, новинар и основач на Roma News

Кога го основав Roma News, имав една јасна цел: да создадам медиум кој ќе биде гласот на ромската заедница, но и платформа која ќе ги отвори прашањата што остануваат незабележани во главните медиуми. Денес, можам со гордост да кажам дека Roma News е повеќе од медиум – тоа е движење што инспирира промени и ги руши стереотипите за Ромите. Но, како што растеме и постигнуваме успеси, така растат и пречките кои се обидуваат да го замолчат нашиот глас.

Во изминативе години, Roma News постигна нешто што многумина го сметаа за невозможно. Стана место каде што Ромите, но и сите што сакаат вистина и правичност, можат да ги споделат своите приказни. Покренавме дебати за дискриминацијата во образованието, за пристапот до здравствена заштита и за злоупотребата на Ромите во политичките процеси. Нашите истражувачки текстови отворија очи за многумина и иницираа конкретни чекори во заедниците.

Но, успехот на Roma News не се мери само преку бројот на објавени текстови или дебати – тој се мери преку влијанието што го имаме. Благодарение на нашата работа:

• Отворивме прашања за дискриминацијата во институциите, притоа вршејќи притисок врз локалните власти да преземат мерки.
• Се бориме против лажните стереотипи, презентирајќи успешни ромски приказни, како пример за тоа што може да се постигне со еднакви шанси.

Но, и покрај овие успеси, секој ден се соочуваме со економски бариери. Ромските медиуми не добиваат еднаков пристап до финансирање како останатите. Кога Roma News ќе аплицира за грант, се поставуваат бесконечни бирократски услови кои се скоро невозможни за еден мал и независен медиум. Оние што имаат моќ на пари не сакаат медиуми како нашиот да просперираат. Зошто? Затоа што ги рушиме лажните наративи кои им служат на тие што сакаат Ромите да останат на маргините.

Наша сила е тоа што никогаш не се откажуваме. Roma News продолжува да функционира благодарение на нашата посветеноста и поддршката од заедницата. Но, замислете што сè би можеле да постигнеме доколку имавме еднаков пристап до ресурси. Замислете медиум кој не само што ќе раскажува приказни, туку ќе менува судбини на цела заедница.

Вистината е дека Roma News не е само медиум за Ромите – тоа е медиум за секој што верува во правда, еднаквост и можност за сите. И покрај тоа што тие што ја имаат моќта на парите не сакаат да успееме, ние ќе продолжиме да се бориме. Нашите успеси се доказ дека гласот на Ромите не може да биде замолчен.

Сега, прашањето е дали општеството ќе застане зад нас? Дали ќе ни дадете шанса да продолжиме да работиме и да бидеме гласот на промената? Одговорот не е само во нашите раце, туку и во вашите.